姑不姑

吉叔與吉仔排隊等車，好不容易盼得車來了，忽地橫裏殺出個小姐，二話不說就要衝上車去。吉叔哪敢怠慢，一手攔住她。小姐身手也非等閒，側身避過。吉叔跨步斜身擋着她，令她不得寸進。她怒目尖叫：「咩事呀。」吉叔雙眉一揚：「你打尖呀，阿姑。」不知哪一句鎮住了她，她聞言乖乖讓開了。

（路人甲：絕對是「阿姑」……給文藝中年這樣一句，肯定五雷轟頂……）

（路人乙：吉叔小心呀，港鐵前幾天上演「膝頭撞大肶」，那位肥婆阿姑一拳打到男人腿上，繼而在車廂展開10多分鐘罵戰上了youtube……﹝阿姑呢句要發揚光大……﹞）

吉叔都覺得係第二句。事關佢講完第一句，睇小姐個款仲想駁嘴，但佢講完第二句，小姐即刻謝晒。平時佢都係教吉仔要禮讓，今日實在趕時間，排隊的人又多，豈容她插隊，只好出手。事後佢都抹一把汗，萬一小姐喊非禮，佢就周身蟻矣。

（路人丙：以女人的心理，絕對是第二句！她還會恨很多天，活該！她沒敢發威，敢情是吉叔那上海灘呂良偉＋羅嘉良的臉……^+++^）

（路人丁：吉叔的「咏姑」戰術真厲害，怕吉仔學了，可能日後傷人無數，宜先補一課，聽聽王菲的《容易受傷的女人》。）

（路人戊：講「你打尖呀，小姐」唔好咩？）

吉叔當時講咗第一句，見冇乜效果，電光火石間感覺要來句重話唬一唬她，第二句就衝口而出。呢位小姐年歲喺姑與不姑之間，興許她以為自己未到姑字輩，卻被吉叔當頭棒喝，大抵頗受打擊，一時回不過神來，吉叔與吉仔已竄上車去了。佢本來係是兵行險着，好彩湊效。可見呢位小姐火喉未夠，仲有啲羞恥之心，否則吃虧的可是老吉了。